【Cut卡教學】如何取消信用卡？

唔少人攞信用卡都係為咗份迎新禮物，當收齊禮物或者用開嘅優惠完咗之後，都會產生要Cut卡嘅念頭。不過你又知唔知幾時先可以Cut卡呢？仲有取消信用卡有咩手續要做呢？就算唔知都唔洗怕，睇完呢篇文章包你了解更多！

Cut卡手續

主要可以分為兩類，大部分銀行打去熱線搵職員處理已經可以，另一類銀行係要收返張卡，可以親身攞去分行或者寫填份form連埋張卡寄返畀銀行辦理。建議大家可以先打去熱線，問清楚所需手續，可能對一對資料就可以成功Cut卡。

如果你申請信用卡同時賺埋佢嘅迎新禮物，咁就要留意返，大部份信用卡嘅條款都要求keep一年以上，如果一年內取消信用卡，銀行有權收取相等於迎新禮物嘅價值。以下我地搵咗幾間銀行嘅資料畀大家參考：

銀行	最少Keep卡期	取消嘅費用
滙豐	13個月	已獲取嘅迎新獎賞之等值
恒生	13個月	已獲取嘅迎新獎賞之等值
大新	13個月	$300
安信	12個月	$600
美國運通	12個月	美國運通I.T Cashback卡、美國運通Blue Cash信用卡：已獲取嘅迎新優惠、首年年費美國運通白金信用卡、美國運通國泰航空尊尚信用卡、美國運通國泰航空信用卡：已獲取嘅迎新優惠
渣打	12個月	已獲取嘅迎新獎賞之等值

八達通自動增值處理	如果張信用卡連咗八達通自動增值服務，喺取消信用卡之後，相關自動增值服務將會被停用。可以先打去八達通顧客服務熱線2266 2222辦理取消手續，之後會收到一封取消自動增值服務專函，帶埋封信同八達通去任何港鐵客務中心，就可以取消自動增值服務。
未償還嘅款項	如果信用卡有任何未償還嘅欠款，例如之前留低嘅卡數、分期簽賬、分期借貸等，都要喺取消之後還返晒，提早償還貸款可能要收額外手續費添。
自動轉賬	如果有做落自動轉賬，需要直接聯繫相關商戶，申請改用另一張信用卡，確保交易可以繼續自動完成，以免影響有關服務運作。
附屬卡/貴賓卡	所有有連繫嘅附屬卡/貴賓卡/會籍將會一次過全部取消埋。
信用卡賬戶餘額	如果信用卡賬戶有餘額，最簡單可以用埋先取消，或者聯絡銀行安排退款支票。
信用卡積分/現金回贈	同信用卡賬戶餘額一樣，最好用埋先取消就唔洗煩，Cut卡後所有積分都會被取消。
信貸額使用率	你嘅信貸額使用率會因為取消信用卡而上升至80%。一般信貸額使用率維持喺50%或以下算叫做健康水平，信貸額使用率一旦高過50%，銀行或金融機構可能會質疑你好等錢洗，因而有機會對信貸評級構成負面影響。