【BNO移民】英國樓盤網+熱門城市買樓攻略

移民去英國生活，住屋都係其中一個要解決嘅問題。銀彈充足、而又打算揀好個地方長住，當然可以考慮在英國置業。無論你係咪英國公民，都可以喺英國購買物業自住或放租。除咗去到當地搵地產經紀/代理，都有唔少買樓網站有樓盤揀，今次我地會同大家介紹吓英國買樓嘅資訊。

英國熱門買樓網站

同香港一樣，想買樓上網就可以搵樓，有全國性嘅網站，亦都有針對個別城市嘅買樓網，大家不妨睇多幾間先決定。以下係一啲英國熱門買樓網站嘅例子：

rightmove
Zoopla
Home
OnTheMarket
ESPC (以愛丁堡、格拉斯哥為主)
ASPC (以鴨巴甸為主)

買樓最重要都係睇樓價，每個地區樓價唔同，倫敦物價最高，當然樓價都係最費，倫敦平均樓價高達4百多萬港元。如果覺得太貴，可以比較埋其他地區，樓價低至100 萬港元都有，例如利物浦（Liverpool）、錫菲（Sheffield）買日常用品會平啲，居住伯明翰（Birmingham）、卡迪夫（Cardiff）日常開支都較低。想要有倫敦嘅生活但又唔想物價咁高，可選擇居住曼徹斯特（Manchester）、布里斯托（Bristol），佢哋都有同倫敦相近文化、夜生活。

倫敦 London

倫敦憑藉全球金融中心地位同埋擁有各項頂級城市嘅優勢，包括世界領先嘅文化、休閒設施，一直都係受全球投資者關注嘅城市，樓價繼續係全英國第一。英國哈里法克斯銀行（Halifax）銀行最新報告顯示，比較英國各地樓價過去二十年嘅表現，當中樓價升幅最多嘅頭十位，九個位於倫敦。以倫敦三大金融區嚟講，包括一區市中心, 二區金絲雀碼頭以及五區克羅伊登。都算係最保值嘅地段，但入場費相對會較高。

伯明翰 Birmingham

伯明翰係歐洲最年輕嘅大城市之一，英國第二大城市，45%人口喺30歲以下。包括五所頂尖大學約65,000名學生，對企業招攬人才具有吸引力，隨著愈來愈多跨國企業陸續進駐，人口預料會繼續增長，對住房需求越嚟越大。而家當地每間房屋入場費約200萬港元至300萬港元，比倫敦平一大截。

另外，伯明翰亦係一座轉型中嘅城市，將耗資11億英鎊、為期20年進行市區擴展規畫項目Big City Plan，項目透過重新規畫當地住宅、商業空間同基礎設施，改變並釋放這座城市嘅潛力。仲有，伯明翰嚟緊會舉辦2022年英聯邦運動會，亦都起緊高速鐵路（HS2），直接連接首都倫敦，預計2026年投入使用，都有助經濟增長。

利物浦 Liverpool

利物浦係個增長最快嘅英國城市之一。利物浦嘅城市文化具吸引力，生活成本較倫敦低，所以吸引唔少英國投資者去利物浦置業。利物浦市內大部分住宅都係排屋（Terraced），其次係半獨立屋（Semi-detached），大廈公寓嘅比例較少。以中低價單位較搶手，成交最高為介乎5萬至10萬鎊嘅住宅。另外，城市重建計畫對利物浦樓市起到提振作用，包括當地政府進行緊總價值接近140億英鎊嘅利物浦本地計畫（Liverpool Local Plan）。

布里斯托 Bristol

作為英國西南部嘅樞紐城市，目前，布里斯托嘅經濟主要以金融、電子科技、創意媒體行業為主，同時亦以一連串酒吧、餐廳、劇院、夜生活而聞名。根據CNBC舊年年底做咗個調查，根據就業率、工作與生活嘅平衡、可負擔樓價等，挑選英國最佳居住、工作嘅城市，布里斯托得到第四名。而英國買樓網站Rightmove都公布咗2019年數據，除咗倫敦以外，查詢布里斯托嘅買賣搜尋次數係最多嘅城市，而且布里斯托嘅衣食住行開支都比香港低，的確唔少人都想嚟呢度生活。

曼徹斯特 Manchester

曼徹斯特係倫敦以外英國最大嘅經濟區，相比起倫敦，曼徹斯特嘅樓價較低，約20至30萬英鎊即可買到間一房一廳嘅屋。曼徹斯特有10個地方自治區，其中以索爾福德（Salford）、特拉福德（Trafford）地區最受歡迎。現時當地係英國第二人口最多嘅城市，人口超過255萬。城市經濟體系成熟，交通網絡發達，有英國最大嘅國際機場，被譽為英國西北地區最具前瞻性同活力嘅城市，亦係英國重要商業中心之一，近年經濟一直處於高速增長狀態。隨住連接倫敦嘅高鐵起好，加上曼徹斯特中心區寫字樓租金只係倫敦四分一，預計會吸引唔少企業遷入，帶嚟勞動人口，刺激樓價和租金上升。

英國買樓印花稅

同香港一樣，英國置業印花稅都係累進制。住宅物業印花稅門檻係12.5 萬鎊，如果買非住宅物業，印花稅門檻會貴啲，15 萬鎊。如果首次置業，就算唔係英國國民，都可以有首置稅務優惠，喺英格蘭購買 50 萬鎊以下嘅物業，頭30 萬鎊可免收印花稅，喺蘇格蘭，17.5 萬鎊以下物業可免收印花稅，喺威爾斯，18 萬鎊以下住宅，都可以免徵印花稅。而非首置人士係需要額外繳交3%印花稅。

另外，去英格蘭、北愛爾蘭置業嘅非英國居民，由2021年4月1日起，購買物業需要支付額外2%嘅額外印花稅，用於解決當地露宿者問題，要買就快喇！

樓價	繳稅部份	稅項
£125,000	£125,000	0%
低於 £250,000	£125,001 至 £250,000	2%
低於 £925,000	£250,001 至 £925,000	5%
低於 £1,500,000	£925,001 至 £1,500,000	10%
超過 £1,500,000	超過 £1,500,000	12%

注意事項

英國買賣物業嘅經紀佣金是由賣家一力承擔，一般係0.75%至3.5%，另加增值稅（VAT）。所以買家係唔需要畀任何中介費用
英國買樓嘅相關費用包括稅項（印花稅及市政稅）、按金（即首期）、產權轉讓費、測量費、按揭費用、保費、地租和服務費等
外國人都可以喺英國申請按揭。各大銀行、房屋協會都有提供按揭服務，但申請條件各有不同，針對外國居民嘅條件可能會比較嚴格，利率亦可能較高。
買樓需要畀市政稅（Council Tax），係對住宅財產所徵收嘅稅項。金額取決於房價同埋居住地所屬嘅議會，分10個月畀，用作支付地區服務。

獨家獎賞

信用卡

貸款

保險

理財文章

討論區