淘寶香港便利店、郵局直接提貨

唔少香港人都鍾意淘寶，不過送貨時間屋企未必有人，又唔方便寄公司收，有人就會選擇親自去速遞公司或集運商門市、便利店提貨。最近淘寶官方同香港郵政、7-11、順豐速運、中通快遞、遞四方速遞合作，提供「自提點取貨服務」，加多咗好多提貨點，真係總有一個喺左近，運費亦平啲。而便利店最大好處，就梗係24小時都可以去提貨喇。

要用呢個「自提點取貨服務」，買嘢Checkout個陣，揀「使用轉運服務」，再揀「修改轉運商」，再揀「自提點」，就可以揀地區同收貨地點。新加嘅收貨地點超過200個，當中郵局比較多。唔同嘅收貨地點，貨物重量、運費都有唔同。

官方自取嘅運費，首kg運費都係$20人民幣樓下，中通同遞四方更加係$9，比直接速遞平一大截，亦平過其他速遞公司自己搞嘅轉運或自提服務。而且由8月25號至9月5號，喺淘寶網、天貓或聚划算買嘢，用官方自提點取貨服務仲有優惠，首kg運費有75折。另外有啲信用卡只收1.5%手續費，例如中銀、中信銀行(國際)、上海商業銀行等等，有呢啲卡就可以慳多啲啲。