林祖輝專訪：老竇着Jordan 阿仔都會着

 

電視藝員出身嘅林祖輝，其公司Rookie坐擁多個國際童裝品牌，品牌優勢令佢盤生意「易做咗好多」，同時喺推銷產品上事半功倍。另外，喺電視圈台前幕後打滾多年，回望舊東主亞視倒閉嘅悲劇，林祖輝感受至深，埋怨當時老闆唔識經營電視台。

 

需要清晰品牌定位

 

Rookie坐擁Jordan、Nike、Converse同Levi's等國際童裝品牌，享有品牌優勢，林祖輝需要考慮嘅，係清晰各品牌嘅定位，避免品牌間出現不必要嘅競爭，「大家（品牌）定位雷同，係自己撞自己生意，冇意思；如果定位有少少唔同，各有特色，咁對客人嚟講係好事。」所以各分店會針對客源消費力，同埋以往銷售上嘅「大數據」嚟入貨，決定點樣陳列產品，務求客人第一眼就見到切合需要嘅品牌產品，進行選購。

上述幾個品牌為人熟識，節省公司唔少建立同宣揚品牌嘅功夫。林祖輝認為呢幾個品牌嘅價值係「無價」而且「細水流長」，品牌無論喺經營理念，抑或產品設計同質素上，都係「世界最頂尖」，「（品牌本身）已經好完美，令我哋生意易做好多。」

品牌嘅作用唔單止咁，由於呢幾個品牌嘅潮流服飾同樣做得出色，Rookie喺推銷產品上事半功倍，「啲人本身着開Jordan，阿仔出世，畀阿仔着囉，你唔需要推銷佢。」

 

▼Nike童裝係Rookie代理嘅其中一個品牌

 

搞電視最叻係邵逸夫

 

做老闆之前，林祖輝喺電視出身，做過台前幕後，及後到內地擔任一家大公司嘅高層，近年先返嚟香港做童裝生意。今日從生意人同前資深電視人嘅角度，睇返亞視倒閉嘅悲劇，不勝唏噓。

林祖輝直言搞電視台絕不容易，喺香港只有少數人識得營運，當中最叻果個係已經過世嘅邵逸夫。另外林祖輝話，已過世嘅前亞視老闆林百欣雖然唔係電視人，但搵到識得營運電視台嘅人幫手，「畀自由佢哋，信任佢哋去做，咁就可以搞好電視台或（營造）好嘅環境。」

亞視倒閉前嘅幾年，收視頻頻下跌，無耐仲油盡燈枯；當年輝煌一時，有能力同無綫撼過嘅電視台，難逃熄機嘅厄運。

 

▼林祖輝演出過亞視多套劇集，包括武俠片《仙鶴神針》

 

「老闆係咁，結局就係咁」

 

正式熄機前，唔少同林祖輝合作過嘅舊同事仍然緊守崗位，「（佢哋）都係電視台嘅精英、專業人士，但要畀人拖糧，朝不保夕，喺出面畀人笑，咁點解啫！？」

林祖輝認為，當時亞視嘅老闆憑「長官意志」去營運電視台，但對行業冇乜長遠眼光同發展計畫，「大家要同佢一齊去癲，去東就去東，去西就去西，佢鍾意跳舞就走埋出嚟，咁唔係經營一家公司嘅方法！」為此，林祖輝無奈感嘆，「冇辦法，老闆係咁，結局就係咁。」

 

林祖輝喺上一條片有更多生意經分享畀大家，想知，請按此連結