改名兼改制 Hilton Honors換房更具彈性

Hilton酒店集團本身有一個「Hilton HHonors希爾頓榮譽客會」嘅酒店常客計劃，可以住酒店儲積分換再換免費住宿或其他旅遊獎賞。最近佢改咗名，少咗個「H」，變成「Hilton Honors」，嚟緊呢幾個月仲有一啲變動，彈性大咗。

 

換房積分5,000分起跳
之前酒店會分做10個級別，級別愈高，換一晚酒店房所需積分愈多。而每一級都有一個積分範圍，例如第9級就由50,000至80,000分不等。由3月1號開始，有新嘅積分加錢換房機制 (The Points & Money Rewards)，由5,000分起跳，每1,000分咁加上去，對應大部分酒店，無論咩級別都可以用5,000分加錢換。

當然，純用分換房仍然存在，即係用積分加$0去換，而要用嘅積分就同原本每個級別嘅最高所需積分一樣。而係新制之下，所需積分會隨住酒店價格改變，例如淡季換房嘅積分可能會比原本嗰個級別嘅最低積分要求更低。

至於賺分同會員級別方面，可以由現金支付部分賺到積分，住宿晚數同次數亦會繼續計入會員級別維持同升級。

用分換房時可以將Slider拉左拉右嚟調整用幾多分同錢換，拉到最右就係純用分換。

每1,000分大約價值3至6美元不等，視乎酒店而定，上圖例子就係1,000分=US$5.5。

 

積分合併使用
4月將會加入積分合併功能 (Points Pooling)，可以聯合10個親友，即係集合11人嘅積分使用。每人每年最多可以供500,000分出嚟，隊長最多可以接收2,000,000分，積分會係過戶之後24小時就可以用，唔需要手續費。集合積分除咗換房，一樣可以換禮品 , 里數、交通、門票等等。

 

鑽石會籍額外延長等級一年
要保持住鑽石會籍，每年要住夠30次、60晚或儲夠120,000基本積分。如果唔夠就會降級。如果會籍就嚟到期又未達標，可以喺3月31日或之前經官網申請鑽石會籍延期一年，喺延期嗰年完結前達返標就可以繼續維持住鑽石會籍。呢只要已經成為鑽石會員3年或以上，累積250晚住宿或500,000基本積分，就可以申請。不過呢個優惠係一生人一次，今次用咗之後就冇得再用。

 

積分Amazon買嘢當錢用
Hilton Honors將會同Amazon合作，可以將Hilton Honors積分喺Amazon買嘢當錢用。只要將Hilton Honors連結去Amazon戶口，買嘢畀錢嗰陣就可以揀用Hilton Honors積分作為付款方式。不過推出時只限美國Amazon，其他國家Amazon (例如 Amazon.co.uk、Amazon.jp) 暫時未用得住。呢項功能將會喺7月推出，至於Hilton Honors積分喺Amazon嘅兌換率，暫時仲未公佈。

 

總結－積分運用更靈活
雖然之前都可以用積分加現金換房，不過高等級酒店最低都要萬幾二萬分起跳，實行咗新制之後，夠5,000分就可以換房，可以1,000分咁加上去，換高等級酒店房就更加可以用盡積分當減價，啱晒唔係經常去旅行嘅朋友。而且可以同親戚朋友合併積分，最緊要係集合積分唔收手續費，真係幾方便。