平遊深水埗 • ＄40帶你掃米芝蓮小食

如果一提到米芝蓮通常都會覺得價錢好貴，但其實米芝蓮唔一定係貴嘅，係深水埗有三間拎到2017年米芝蓮街頭小食推介添！到底邊三間好巴閉?就係合益泰小食、公和荳品廠、坤記糕品專家啦！其實依三間都係老字號，相信大家都唔會陌生啦，今日我就去咗其中兩間米芝蓮街頭小食推介再加一間成日逼爆既馳名蛋牛治店做個臥底睇下佢地有無keep住水準喇。

 

等我出發話比大家知香港又平民又地道小食其實都好值得一試再試㗎喇！

 

港式懷舊糕點 -  坤記糕品專家

地址：深水埗福華街115-117號北河商場地下10號舖

食物：紅豆糕 $9 、砵仔糕 $7

個人評分 :

紅豆糕  ★★★★☆  (5星滿分)

砵仔糕  ★★★★☆  (5星滿分)

 

▲紅豆糕嘅紅豆好多好滿，味道適中唔會太甜，口感方面，紅豆唔會好死實，反而係整到好似紅豆蓉咁，食落好有紅豆沙嘅感覺！

 

▲食砵仔糕當然要食黃糖味啦，味道都一樣適中唔會太甜，而紅豆份量都唔算少，砵仔糕嘅紅豆比紅豆糕口感粒粒分明啲，而糕點黃糖味都足，對於7蚊依個價錢嚟講絕對抵食！

 

百年歷史 -  公和荳品廠

地址：深水埗北河街118號地下

食物：煎釀豆腐 $10 、豆腐花 $10

個人評分 :

煎釀豆腐  ★★★★★  (5星滿分)

豆腐花      ★★★★☆  (5星滿分)

 

▲食公和一定要食佢地熱辣辣嘅煎豆腐，豆腐都幾厚身又香滑柔軟，另外仲有少少魚肉襯托下唔會咁dry，記得食煎豆腐落甜醬呀，好味好多㗎！

▲通常食豆腐花都會好多糖漿同黃糖，但公和嘅豆腐花豆味好香濃，所以糖漿真係可以慳返，只係落少少黃糖同豆腐花一齊食味道啱啱好呀！

 

超足料蛋牛治 -  新香園

地址：深水埗桂林街38號A地下

食物：馳名蛋牛治 $19

個人評分 :

馳名蛋牛治      ★★★★☆  (5星滿分)

 

▲唔好睇蛋牛治好似好普通咁，呢間新香園嘅蛋牛治就一直都保持住超人氣。蛋牛加埋一齊煎，每一啖都充滿牛肉嘅鮮味同蛋香，加埋烘咗底嘅麵包，真係啖啖都咁滋味呀！