而家愈來愈多電子錢包，可以P2P轉賬，有啲甚至可以由信用卡過數去人哋戶口，再入銀行戶口套現。之前匯豐宣布推出PayMe電子錢包，今日終於正式開放下載，即刻同大家試用下。
跨行信用卡過數
雖然PayMe係匯豐推出，但唔需要匯豐戶口都可以用到，只要用電郵地址、手機號碼、同香港居民身份證登記就可以用。同時唔一定要用匯豐信用卡先可以過數，其他銀行嘅信用卡都可以。
如果對方都有PayMe，過數時唔需要知道對方銀行戶口號碼，入落PayMe賬戶，再過落銀行戶口套現。若然對方冇裝PayMe，亦可以經Whatsapp、Messenger、SMS發送訊息，即使對方冇裝PayMe亦可以收錢。
基本資料
每個戶口只可以加入一個銀行戶口同一張信用卡，改用其他銀行戶口或信用卡要先移除原有銀行或信用卡戶口。
最低增值金額：$10
最低P2P轉賬金額：$0.01
最低轉賬至銀行金額：$10
P2P收款不設上限
匯豐信用卡持有人
如您是匯豐信用卡持有人，您不需要提交香港身份證副本即可享受以下增值上限。
增值
匯豐信用卡持有人 (未提交身分證副本)
賬戶結餘上限：$3,000
每日增值上限：$3,000
每月增值上限：$10,000
每年增值上限：$25,000
身份證認證後 (匯豐及非匯豐信用卡持有人)
賬戶結餘上限：$100,000
每日增值上限：$5,000
每月增值上限：$10,000
每年增值上限：$100,000
P2P轉賬
匯豐信用卡持有人 (未提交身分證副本)
賬戶結餘上限：$3,000
每日增值上限：$3,000
每月交易上限：$10,000
每年交易上限：$25,000
身份證認證後 (匯豐及非匯豐信用卡持有人)
賬戶結餘上限：$100,000
每日增值上限：$5,000
每月交易上限：$10,000
每年交易上限：$100,000
轉賬至銀行
匯豐信用卡持有人 (未提交身分證副本)
賬戶結餘上限：$3,000
每日增值上限：$3,000
每月交易上限：$25,000
每年交易上限：$25,000
身份證認證後 (匯豐及非匯豐信用卡持有人)
賬戶結餘上限：$100,000
每日增值上限：$5,000
每月交易上限：$30,000
每年交易上限：$100,000
轉賬時間
轉賬至匯豐 / 恒生戶口：即時
其他銀行戶口：2至3個工作天
Apple App Store下載
Google Play下載
建立賬戶
1. 裝咗App之後，左掃畫面睇完基本介紹，撳「立即註冊」，亦可以用Facebook戶口登入。
2. 假切要開一個新戶口，睇完條款剔選同意，亦可以揀唔收宣傳資料。
3. 輸入姓名、電郵地址之後，會收到一封驗證電郵，撳返入面連結做驗證。
4. 設定6位交易密碼，唔可以用相連 (e.g. 123456) 或相同數字 (e.g. 122345)，再次輸入確定就完成。
加入信用卡
1. 撳左上角功能表，係「設定」>「銀行及信用卡資料」>「信用卡」加入信用卡。如果係第一次用PayMe，撳主頁右上角「+增值」都可以加入信用卡。
2. 輸入信用卡號碼、到期日、CVV碼。
3. 用身分證驗證，撳中間「上載您的香港身分證副本」，就會打開相機，影身分證正面資料上傳。影身分證時最好用白色背景，或者用張白紙墊底。之後就會進行認證，大約要等1至2分鐘，如果太耐冇反應，可以隔一陣再試。加卡會過數$1測試信用卡係咪有效。
增值PayMe
1. 加完卡喺主頁右上角撳「+增值」，輸入金額。
2. 輸入交易密碼，之後就會即時增值。
3. 今次我就加咗中銀i-card入去，增值咗$100。
加入銀行戶口
1. 撳左上角功能表，係「設定」>「銀行及信用卡資料」>「銀行戶口」加入銀行戶口。同增值一樣，如果係第一次用PayMe，撳主頁右上角「+增值」上面嘅Icon都可以加入銀行戶口。
2. 揀銀行、輸入戶口持有人名稱、銀行戶口號碼。
3. 輸入交易密碼。
轉賬入銀行戶口
1. 撳主頁右上角「+增值」上面嘅Icon。
2. 輸入轉賬金額，再入交易密碼。
3. 過數入匯豐戶口。
P2P轉賬
1. 撳主頁下面「轉賬」。
2. 輸入轉賬、訊息，再揀邊啲人可以睇到呢次交易，可以收款人同自己，亦可以揀PayMe朋友。揀PayMe朋友的話，雙方朋友都會見到呢次轉賬嘅訊息，但唔會見到金額。
3. 揀收款朋友，暫時只可以經P2P轉賬邀請朋友加入PayMeh好友。如果未加朋友，可以撳「付款給新朋友」做轉賬。
4. 揀發送收款訊息嘅途徑，可以經Whatsapp、Messenger、SMS發送。
5. 例如揀SMS發送，輸入交易密碼。
6. 之後收款連結加入SMS，喺電話簿揀返收款人。
7. 對方收到SMS，可以喺7日內撳收款連結就可以收款。
8. 萬一入錯銀碼，又或者Send錯人，對方未收款，都可以即時取消付款。
增值PayMe當現金透支？
用信用卡增值PayMe會當係信用卡付款，而非現金透支，唔會收手續費。
可當免息套現？
如果用匯豐信用卡或戶口過數或收錢，匯豐唔會收取額外費用，但如果用其他銀行嘅信用卡或戶口，匯豐就話要視乎其他銀行嘅規定。
可否儲信用卡積分 / 里數 / 回贈？
用信用卡增值PayMe會當係信用卡付款，而非現金透支，可以賺信用卡獎賞。不過銀行會唔會見多人用佢嚟無限輪迴賺獎賞而限制增值PayMe所賺到嘅獎賞，甚至冇獎賞，咁就要視乎各銀行嘅做法。暫時已知匯豐 (4月1日起冇分)、DBS、中銀會有基本積分，渣打冇分。
與其他電子錢包P2P轉賬功能比較
一開始都有提過，而家唔少電子錢包都有P2P過數功能，其實匯豐流動理財手機App入面都有「匯豐轉賬易」P2P轉賬功能，不過呢項功能只限匯豐戶口轉賬去網上理財客戶或恒生個人e-banking客戶，唔夠其他電子錢包方便。
如果計可以直接加入信用卡，由信用卡增值，再轉入銀行戶口又唔收手續費，暫時就只有PayMe同WeChat Pay，賺信用卡獎賞都可以靠呢兩個App。而八達通「好易畀」要經八達通自動增值先賺到信用卡獎賞，迂迴咗少少。