【移民要幾錢？】10大移民地點創業/技術/投資移民比較

「移民」係近期喺Google搜尋次數暴增嘅關鍵字，你又有冇考慮過要移民呢？呢篇文章會同大家探討吓，最近香港同埋最多人選擇嘅地點係台灣，其實仲有可多其他選擇，例歐洲嘅地中海小國馬爾他、英國、葡萄牙，英聯邦國家成員國加拿大、澳洲同紐西蘭，或者亞洲區嘅日本、馬來西亞、新加坡，都可以考慮。本文詳列各國移民門檻同要求。

10國家投資移民門檻比較

國家	投資移民門檻（港幣約數）
英國	$1,948萬／$4萬（BNO）
台灣	$115萬
馬爾他	$216萬
加拿大	$1,147萬
澳洲	$2,654萬
日本（移居）	$40萬
馬來西亞（移居）	$35萬
新加坡	$1,383萬
紐西蘭	$1,467萬
葡萄牙	$341萬

BNO 5+1簽證移民英國

如果你有BNO，則現在以5+1簽證移民英國非常簡單平宜，首先你要申請Hong Kong BN(O) Visa，申請費用為£250，身體檢查費£3,120，總共£3,370（約HK$36,100）。可為配偶、子女、父母等以「受養人」身分一起申請。獲批Hong Kong BN(O) Visa後可以在英國逗留5年，可以工作與讀書，但不享福利。逗留滿5年後可申請無限期居留權，再逗留1年後即可申請入籍英國。

如你未能以BNO方法移民英國，則需要循以下傳統方法移民英國：

想移民英國必先透過工作 / 投資，取得臨時居留簽證（Temporary residence permit），再連續居滿 10 年，攞到永久居留（Permanent residence permit），最後居滿 12 個月，通過 Life in the UK測試，申請入籍，成為英國公民。

英國投資移民

透過投資至少 200 萬英鎊於指定基金或投資產品，為期 5 年，再喺英國投資銀行開立戶口，就可以申請到投資簽證條件（Investor Visa Tier 1）。

英國創業移民

申請人要投資5萬英鎊創立新企業，英語讀寫聽說能力獲 CEFR B1級或者擁有學士學位或以上學歷，再證明有足夠資金喺英國生活，就有資格申請創新者簽證。

英國簽證與移民局網站

最熱門：115萬投資移民台灣

據台灣內政部移民署統計，去年港人到台灣居留嘅人有5,858人，比前年增加41.12%。而且由上年9月起至今年3月，每月港人去台居留嘅人數都在600人以上，比往年同期多。咁究竟香港人要移民去台灣有乜方法？

台灣投資移民

目前香港人可以按「香港澳門居民進入台灣地區及居留定居許可辦法」規定，以投資移民、創業移民、技術移民或者就學等方式申請在台居留。其中透過投資移民係需要喺台灣有600萬新台幣以上投資，可申請在台居留。亦要喺台灣連續居留滿一年，就可申請定居許可，取得身分證。之後都要營運投資企業至少3年，並聘用至少2個台籍員工。

台灣創業移民

第二個途徑係創業移民，所需資產較投資移民少，只要經由台灣政府認可嘅「國際性募資平台」，為企業成功籌集200萬新台幣資金，即可獲一年居留簽證，其後再由台灣政府審核業務，公司營運滿5年，當中每年居住滿183日，申請人便可以入籍台灣。

以個人身分申請創業移民，除咗要有高中或以上學歷，亦要符合以下其中一項條件：

獲得國內外創業投資事業投資，或於政府認定之國際性募捐平台籌資200萬元新台幣以上者。
已獲同意進駐政府認定之新業園區或育成機構者。
取得國內外專利權者，或具專業技能。
曾參加國內外具代表性之創業、設計競賽獲獎，或申請政府鼓勵外國創業家來台專案計劃通過者。
設立符合「具創新能力之事業認定原則」化事業，擔任該事業負責人並投資新台幣100萬元以上者。

台灣技術移民

仲有就係技術移民，申請人只要具備專業技術能力，又有香港或澳門執業相關證書，或喺學術、科學、文化等專業領域有特殊成就，就可以申請喺台灣居留，仲毋須作任何當地投資，不過呢個技術門檻一啲都唔低。

台灣移民署網站

216萬買債券移民馬爾他

馬爾他係個位於南歐嘅小國，由幾個島嶼組成，素有「地中海心臟」之稱，譽為「歐洲後花園」。另外，佢同時係歐盟國家、歐元區國家、神根國家、英聯邦國家。官方語言為馬爾他語同英文。社會保障方面都算完備，實行免費教育、免費醫療、退休保險制度等。所以成為歐洲移民界嘅「新寵」。

聽落幾好咁，投資移民過去又難唔難呢？條件係以下兩樣：

購買政府指定嘅25萬歐元國債，並持有5年以上
購買或租賃符合政府要求嘅房地產，並持有5年
- 買樓：馬爾他北部要買32萬歐元以上，哥佐島或馬爾他南部要買27萬歐元以上
- 租樓：馬爾他北部每年1.2萬歐元以上，哥佐島或馬爾他南部每年要租1萬歐元以上

完成之後，唔需要坐移民監、開公司、審查背景、學歷要求，5年後可以贖回之前買嘅國債，仲有息賺，跟手可以申請埋全家四代馬爾他可續簽嘅永久居留許可。

馬爾他移民局網站

1147萬資產投資移民加拿大

加拿大投資移民

加拿大都唔係最近先成為香港人熱門移民國家，早在回歸前已經有唔少香港人過咗去定居。不過要移民過去都唔係咁容易，因為加拿大政府對投資移民嘅資產要求都唔低，申請人需擁至少200萬加幣資產，包括現金收入、股票和物業等。另外過往5年，申請人需要有具最少2年業務管理經驗，再投資120萬加元於指定嘅移民基金，為期5年，之後可以攞返本金。

加拿大技術移民

另外，加拿大有提供快速移民通道（Express Entry）作技術移民申請。但係要遁呢個方法移民係一啲都唔簡單，首先要收到加拿大移民局發出嘅加拿大永久居民身份申請邀請下，咁先有資格申請移民加拿大。而且加拿大移民局對快速通道申請人嘅要求都好嚴格，申請人嘅專業經驗要同加拿大嘅勞動市場需求吻合，確保新移民能貢獻加拿大嘅經濟都可以。另外對職業、工作經驗、語言能力、學歷等都有不同要求。

技術移民係要收錢架，單人申請費用係1,040加元，包括550加元申請費同490加元登錄費，如果申請被拒批，可以退回登錄費。

加拿大移民局網站

2654萬投資移民澳洲

澳洲都係另一個港人熱門查詢嘅移居地方，佢本身係個多元文化共融嘅國家，有頂尖嘅教育水平、健全嘅福利保障，而且係英語系國家，過去生活至少先唔洗怕語言障礙，下面即刻同大家介紹。

澳洲投資移民

資金充足嘅話，最簡單嘅方法就係投資移民，投資移民去澳洲嘅簽證有幾款，有唔同嘅資金、學歷、營商背景要求，最常見又容易嘅都係重大投資者簽證，只需要投資500萬澳元至國家指定項目，就可以申請臨時居民身份。無歲數限制，唔check資產，又唔睇英語能力，亦都唔需要營商背景。

澳洲獨立技術移民

投資移民去澳洲嘅資金要求高，動輒便需2,000多萬港元。如果你唔夠資金，技術移民就係另一個渠道。只要申請成功，就可以獲得永久居留權喺澳洲生活同工作。有意申請者需要先提交申請意向，澳洲政府會根據專業技術、學歷、語言成績等條件嚟篩選，獨立技術移民仲可以細分為四類，提供不同條件嘅技術移民申請。合資格嘅申請者會獲邀申請獨立技術移民簽證，並必須於60日內申請簽證，整個申請唔洗畀申請費用。

澳洲移民局網站

40萬投資移居日本

日本是香港人係最愛嘅旅遊熱點之一，唔少人已經當咗佢係鄉下，所以唔少人都有移居日本嘅念頭。要移民到日本有咩條件呢？香港人可以點樣入籍日本？睇埋下面了解吓。

要移民到日本，有六種簽證類別可以做到長期居留，包括升學、工作簽證、高度人才簽證、配偶簽證、經營管理簽證等，以一般人嚟講，經營管理簽證就最接近投資移民。

日本經營管理簽證

經營管理簽證嘅申請條件有以下幾個：

投資 500 萬日圓喺日本創業／收購日本公司／擔任日本公司社長
在日本固定嘅公司地址

申請獲批之後，申請者可以得到1年經營管理簽證，可以連同配偶、子女一齊居住喺日本。一年後如果無喺日本有不良紀錄，公司運營正常，而且收入可支持留日生活。就可以申請續簽，按公司營運狀況續簽1-5年經營管理簽證。

日本高度人才簽證

如果唔夠資產，就可考慮高度人才簽證，即係專才計劃。申請者要喺高度學術活動、高度專門技術活動或高度經營管理活動範疇中達到一定水平嘅專才。日本政府會根據學歷、工作經驗、年收入等條件審核，而且喺申請時，「外國高度人才配點表」中攞到達 70 點以上先得。呢種簽證可以居留喺日本5年，仲可以為配偶申請埋工作簽證。

入籍日本

以上只係取得長期居留簽證嘅方法，一般申請人可以喺連續日本居住 10 年以上，當中 5 年以工作簽證或居住簽證居留日本之後，進一步取得求久居留身份。如果持有高度人才簽證而評分有70分嘅話，喺日本居滿 3 年就可以申請。審批條件包括喺日本嘅行為記錄、資產、技能水平等。成功申請後，得到永居身份就可以選擇入籍日本。

日本移民局網站

35萬移居馬來西亞

「第二家園計劃」，睇廣告都應該見過唔少次。的確吸引咗好多退休人士申請，全家人移居到馬來西亞生活。其實除咗第二家園計劃，馬來西亞政府仲推出咗更有彈性嘅「Entry Permit」簽證，一經批核就可以得到永久居留權。

馬來西亞第二家園計劃

「第二家園計劃」嘅賣點係門檻較低，是移居馬來西亞嘅最簡單方法。主要條件就只需要投資一定金額，但十年移居期內原則上都唔可以打工，所以適合一啲經濟條件較好嘅退休人士。但要留意返，由於第二家園計劃只係移居計劃，唔係移民，所以唔會擁有馬來西亞永久居留權。

申請第二家園計劃嘅要求如下：

	21-49歲申請人	50歲或以上申請人
流動資產 (馬幣)	500,000	350,000
每月海外收入 (馬幣)	10,000	10,000

馬來西亞Entry Permit簽證

「Entry Permit」簽證（官方叫MyPR，又俗稱紅卡），係個可以攞到馬來西亞永久居留權嘅方法，但申請門檻較高，一般人都好難達到。

申請資格分成四種：

投資者、專家
專業人士
馬來西亞公民嘅伴侶加埋六歲以下子女
計分制

馬來西亞移民局網站

1383萬投資移民新加坡

同香港一樣都係亞洲四小龍，亞洲區除咗台灣之外，新加坡都係另一個多香港人考慮移民嘅地方。如果要移民新加坡，都有以下方法做到。

新加坡投資移民

新加坡設有全球商業投資者計劃，以吸引海外人士投資移民到當地。申請者需要投資至少 250 萬新幣開新公司營運、擴充現有生意，或者買全球商業投資者計劃基金，投資5年。另外，申請人要至少有3年創業經驗，須提交公司最近 3 年審計財務報告，而公司近1年營業額同埋近3年年均營業額都要達5,000 萬新幣以上。若公司屬私人擁有，必須持有至少30%股權。五年之後，可再滿足指定條件續簽。

新加坡創業投資移民

申請者需要喺6個月用5萬新幣註冊一家新加坡公司，並以企業家、創新者或者投資者身份申請，而且須年滿21歲以上，居住滿24個月後可申請永久簽證。但留意返從事以下業務係唔合資格嘅：

咖啡店，美食中心，食閣巴刹
酒吧，夜總會，卡拉OK，酒廊
足部按摩，按摩院
中國傳統醫學，針灸，中藥配藥
職業介紹機構
風水師

新加坡技術移民

呢個方法係指到新加坡工作，通過持有工作簽證，最後申請獲取新加坡永久居民權。新加坡政府將工作簽證一共分為三個類別：

第一類：Employment Pass

最高級，提供畀高技術水平嘅海外專才（例如管理層、工程師、設計師）

要求：月薪3,900新幣起、大學畢業或專科文憑

第二類：S Passes

提供畀中等技術水平嘅海外員工（如行政人員）

要求：月薪2,400新幣起、大學畢業

第三類：Work Permit

係最低級別、國際勞工就業准證

要求：年齡18 – 50 歲

新加坡移民局網站

1467萬投資移民紐西蘭

紐西蘭都係個移民熱門國家，當地最大嘅亞裔族群就係華人，擁有完善嘅社會福利制度、醫療體系，又喺澳洲享有居民待遇，所以吸引到好多人移民過去生活。以下會介紹幾個紐西蘭移民方法。

紐西蘭技術移民

紐西蘭政府會按年紀、學歷、技能、工作經驗等因素計分，發出移民申請邀請。申請人可以攜同伴侶、24歲或以下子女，到紐西蘭生活、工作、學習。簽證到期後可申請永久居留。如果你嘅專業係喺紐西蘭長期技能短缺列表(LTSSL)之中，申請居留權嘅時間仲可以縮短。

申請「技術人才居留簽證」的條件如下：

55歲或以下人士可以申請
需符合英語能力要求（例如 IELTS 整體6.5分）
申請時需提交意向書(EOI)解釋申請目的、個人履歷
申請分數達160或以上

紐西蘭投資移民

想投資移民到紐西蘭有兩款，分別係Investor 1 Resident Visa同Investor 2 Resident Visa分別在於投資金額。Investor 1要求投資最少1,000萬新西蘭元並投資3年，無年齡限制。而Investor 2投資門檻低啲，適用於65歲或以下，英語能力符合要求，並且有最少3年營商經驗，同埋需要投資最少300萬新西蘭元並投資4年。

紐西蘭創業移民

先要申請企業家工作簽證，申請人需要投資最少10萬新西蘭元、提交詳細嘅計劃書、英語能力符合指定條件、最少有3年營商經驗等等，並且申請分數要有120分或以上。個分數係按投資額、營商經驗、所聘請當地人嘅人數、年度進出資金金額、年紀、業務等等評分。只要持有企業家工作簽證加上喺紐西蘭經營業務超過2年，就可申請「企業家居留簽證」，獲得居民身分。

紐西蘭入境處網站

341萬投資移民葡萄牙

葡萄牙投資移民

2012 年葡萄牙推出咗「黃金簽證」（Golden Residence Permit Program 或 Golden Visa），畀非歐盟公民透過買樓等金融投資，取得當地居留權，屬於長期居留許可，可自由出入神根區。申請人可以選擇以下其中一項投資：

€35 萬歐元保本基金
€35 萬歐元於舊樓重建項目（即樓齡超過 30 年，而且尚未翻新的二手樓）
€50 萬歐元買樓

再完成以下嘅居住要求

第一年要住滿 7 天
第二、第三年合共住滿 14 天
第四、第五年合共住滿 14 天

申請人就可以帶埋配偶同18 歲以下未婚子女一齊去葡萄牙生活。如果要入籍成為永久居民，就要住滿 5 年，喺葡萄牙有住所，再通過葡萄牙語考試，就可以正正式式移民入籍葡萄牙。

葡萄牙入境處網站

總括嚟講，唔同地方有唔同嘅移民政策，有興趣移民嘅，大家不妨先了解自己想過點嘅生活，再搵適合自己嘅移民方法。

獨家獎賞

信用卡

貸款

保險

理財文章

討論區

【移民要幾錢？】10大移民地點 創業/技術/投資移民比較